“Аазіс жыцця” прайшоў у Докшыцах

“Аазіс жыцця” прайшоў у Докшыцах

Ніводныя канікулы ў парафіі Найсвяцейшай Тройцы (Віцебская дыяцэзія) не праходзяць без моладзевых і дзіцячых спатканняў. Штогод у Докшыцы наведваюцца аніматары і ўдзельнікі з Маладзечна, Слоніма, Наваполацка, Гродна, Докшыц і Докшыцкага раёна. На гэты раз нас было каля 60 чалавек. Правёў гэтыя рэкалекцыі з 29 ліпеня па 6 жніўня бр. Віталь Юркевіч з дапамогай сясцёр адараторак Крыві Хрыста з гэтай парафіі.

Удзельнікі разважалі над тэмай біблійнай гісторыі збаўлення. Дапамогай для моладзі сталі канферэнцыі , якія распавядалі пра тое, як насычацца Святым Духам у сваім жыцці, пра сакрамэнт Споведзі, пакліканне і пра ўсе таямніцы Святой Імшы.

Усім вядома таксама, што на гэтых рэкалекцыях можна не толькі пазнаць сябе ў Богу, але і развіць свае таленты ў розных кірунках, знайсці сабе новых сяброў падчас вясёлых гульняў, танцаў і тэматычных вечароў.

Алеж галоўная мэта гэтых рэкалекцый – наблізіцца да Пана Бога, умацавацца ў Святым Духу, і, што не мала важна, захаваць усё тое, што мы атрымалі ў свае сэрцы ў штодзённым жыцці. Бог кожны дзень робіць цуды. І гэтыя рэкалекцыі сталі духоўным набыткам таксама для ўжо дарослых аніматараў. Бог — усемагутны, і толькі варта адкрыць сэрца для Яго і Ён у момант можа змяніць наша жыццё на 180 градусаў. Менавіта для гэтага ў докшыцкай парафіі праводзяцца рэкалекцыі, дзе моладзь збіраецца, каб знайсці Бога.

Вераніка Далжук, г. Докшыцы