13 сакавіка ў касцёле св. Барталамея ў Вільнюсе прайшла святая Імша на беларускай мове, якую ўзначаліў дапаможны біскуп Вільнюскай архідыяцэзіі Арунас Панішкайціс.
Як адзначыў іерарх, з гэтага часу набажэнствы ў касцёле св. Барталамея будуць адбывацца толькі на беларускай мове.
Паводле слоў біскупа, у Вільнюсе ёсць касцёлы, дзе набажэнствы адбываюцца толькі на адной мове (польскай, літоўскай, украінскай), і цалкам лагічна будзе тое, што і беларусы буць мець у сталіцы Літвы «свой» касцёл.
Цешыць вялікая прыхільнасць літоўскіх каталіцкіх іерархаў да беларусаў. Каля года назад, 27 лютага 2015 года, прадстаўнікі беларускай грамады мелі аўдыенцыю ў біскупа Арунаса, дзе ён паабяцаў, што не толькі дапаможа ў вырашэнні праблемы беларусам мець набажэнствы на роднай мове, але і паспрыяе разам з Я.Э. арцыбіскупам Гінтарасам Грушасам таму, каб касцёл св. Балтрамея быў цалкам беларускім. Сёння гэтыя абяцанні выкананыя.
Душпастырам для беларускіх католікаў з Вільнюса і ваколіц прызначаны а. Арыюш Малыска OFM Cap. Такім чынам, капуцыны Беларускай кустодыі распачалі працу ў літоўскай сталіцы.
Набажэнствы на беларускай мове будуць адбывацца штодзённа а 18.00 вечара. У нядзелю будзе дзве Імшы на беларускай мове а 10.00 і 12.00.
Паводле Аляксандра Адамковіча, westki.info
і партала catholic.by